Դիտել Սաադիի վերջին գարունը էջի աղբյուրը

{{Հեղինակ
|լրիվ անուն =Ավետիք Իսահակյան
|դասակարգում =
|սկզբնատառ = Ի
|ծնվել է = 1875
|մահացել է = 1957
|նկարագրություն =
}}

==Սաադիի վերջին գարունը==

&nbsp;&nbsp;&nbsp;&nbsp;Գարուն էր:<br>
&nbsp;&nbsp;&nbsp;&nbsp;Մեկը այն անհամար գարուններից, որ զարդարել են երկիրը և որոնցից հարյուր հատ ապրեց երջանկության և տխրության բանաստեղծը՝ Սաադին:<br>
&nbsp;&nbsp;&nbsp;&nbsp;Առավոտ շատ վաղ զարթնեց Սաադին. իջավ պարտեզը, որ ծաղկում էր Ռոքնաբադ գետի ափին: Նորից լսելու համար բլբուլների երգը և  նորից տեսնելու համար գարնան հրաշքը:<br>
&nbsp;&nbsp;&nbsp;&nbsp;Նայեց Շիրազի դաշտին, որ մանկության շնորհներով ու վարդերով պճնված՝ վաղորդյան նիրհն էր առնում՝ պարուրված թուրայից ճերմակ շղարշներով:<br>
&nbsp;&nbsp;&nbsp;&nbsp;Նստեց ծաղկած հասմիկի տակ, Սպահանի գորգի վրա, և բռնեց դողդոջ մատներով վարդենու նոր բացված կարմիր-կանաչ կոկոնը և մրմնջաց յուրովի.<br>
&nbsp;&nbsp;&nbsp;&nbsp;«Ինչպես մատաղ աղջիկը ժպտում է գգվող սիրականին, այնպես էլ վարդը իր շրթներն է բանում առավոտյան հովիկին»:<br>
&nbsp;&nbsp;&nbsp;&nbsp;Թեև շատ էր ծերացել Սաադին, սակայն նրա հոգին այրերով և ականջով երազի՝ տեսնում էր ու լսում աշխարհի չքնաղ իրերն ու ձևերը, երգերն ու լռությունը անհայտ ոլորտների, որովհետև տակավին զրույց էր աճում նրա հետ բանաստեղծության կախարդ ոգին — Զմրուխտ թռչունր, որ իր հավերժական բույնն էր կերտել Կաֆ լեռան գագաթին, աստղերի մեջ...<br>
&nbsp;&nbsp;&nbsp;&nbsp;Երգում էին բլբուլները՝ գորշ զգեստ հագած և լուսեղեն աչուկներով երգում էին իրենց դյութական սիրո կրակով կրակված,— ու երգում էին Սաադիի սրտի մեջ:<br>
&nbsp;&nbsp;&nbsp;&nbsp;Քնքուշ հովը վարդերի ականջներին կուսական շնչով բարևագրեր էր շշնջում, որ բերել էր հեռավոր սիրահար վարդերից,– և կարդում էր Սաադիի հոգին սիրո բարևագրերը...<br>
&nbsp;&nbsp;&nbsp;&nbsp;«Սիրող սիրտը լսում է միշտ այն բոլոր խոսքերը, որ մրմնջում են իրերը։ Աշխարհը լի է հնչուն դաշնակություններով։ Աշխարհը թրթռում է անվախճան և սիրավառ արբեցումով»,— հիշեց Սաադին իր հին խոսքերը։<br>
&nbsp;&nbsp;&nbsp;&nbsp;Ականջը բլբուլների երգերին և սպիտակ գլուխը կարմրափթիթ վարդերի մեջ սուզած՝ ծծեց Սաադին հեշտության բույրերը, և բույրերով գինովի՝ աչքերը գոցեց.— և տեսավ աշխարհը իր հոգու մեջ, ինչպես երազի մեջ մի երազի։<br>
&nbsp;&nbsp;&nbsp;&nbsp;Տեսավ Հնդու խաղաղության գետերը սրբազան լոտոսներով օծուն։<br>
&nbsp;&nbsp;&nbsp;&nbsp;Տեսավ իմաստուն փղերին, որ խորհում են մթին ջանգյալների մեջ։<br>
&nbsp;&nbsp;&nbsp;&nbsp;Եվ Դեհլիի ոսկեդիպակ ապարանքների մեջ սիգաճեմ աղջիկներին տեսավ՝ գիշերագեղ մազերի մեջ կարմիր նունուֆարներով։<br>
&nbsp;&nbsp;&nbsp;&nbsp;Տեսավ Թուրանի մրրկաշունչ տափաստանները և մրրիկների մեջ խոյացող ամեհի հելուզակներին՝ կայծակե թրերով։<br>
&nbsp;&nbsp;&nbsp;&nbsp;Տեսավ նույնպես անապատը բոցակեզ, բեդվինների նժույգների վազքը սրարշավ. առյուծների հետևից՝ արծիվների թևերի տակ։<br>
&nbsp;&nbsp;&nbsp;&nbsp;Եվ երկյուղած ուխտավորների անծայր քարավանները տեսավ. աղոթքով ու երգով Մեքքայի դարբասների առաջ նրանց ծունկի գալը։<br>
&nbsp;&nbsp;&nbsp;&nbsp;Եվ տեսավ Մսրա աշխարհի հնագեղ հրաշքները և կապույտ ծովերի ծփան բյուրեղը։ Եվ Դամասկոսի թավիշ աղջիկներին, լուսնկա մարմնով, որոնց երկար ու քնքուշ ձեռները, մանյակի պես, փաթաթվել էին երիտասարդ Սաադիի պարանոցով...<br>
&nbsp;&nbsp;&nbsp;&nbsp;Սաադին հառաչեց՝ աչքերը բանալով.<br>
&nbsp;&nbsp;&nbsp;&nbsp;— Ավա՜ղ, անցավ հարյուր տարիս մի գիշերվա երազի պես, թռավ թեթև մի վայրկյանի մեջ, որովհետև դուք միշտ ուղեկցում էիք ինձ, ո՛վ հեքիաթ, բլբուլներ ու վարդեր, և դո՛ւք, վարդերի քույր շնորհագե՛ղ աղջիկներ...<br><br>

&nbsp;&nbsp;&nbsp;&nbsp;Երկնքի երփնավառ պարտեղների միջից դուրս բխեց արեգակը, և հուրհրացին ամեն թերթ ու փերթ, ամեն բար ու գուղձ, որովհետև գիշերը ադամանդի փոշի էր շաղ տրվել բոլոր նրանց վրա։<br>
&nbsp;&nbsp;&nbsp;&nbsp;
Սաադին նայեց շուրջը խորունկ ու հետաքրքիր հայացքով. նայեց երկնքի կապույտ վրանին՝ արշալույսի մեջ թաթախուն, ոսկու մեջ ճախրող թռչուններով։<br>
&nbsp;&nbsp;&nbsp;&nbsp;Նայեց այնպես զարմացած և սքանչացած.<br>
&nbsp;&nbsp;&nbsp;&nbsp;- Այո՛, հրաշք է աշխարհք, հեքիաթ է, գեղեցիկ և անհուն զարմանալի։<br>
&nbsp;&nbsp;&nbsp;&nbsp;Եվ ամեն օր նայում եմ աշխարհին և ամեն օր զարմացած, կարծես, աոաջին անգամն եմ տեսնում աշխարհը.— աշխարհը՝ առօրյա և միշտ հիասքանչ, աշխարհը՝ հնօրյա և միշտ նորաստեղծ, հավիտենական մի անծանոթ հրապույրով առինքնող։<br>
&nbsp;&nbsp;&nbsp;&nbsp;Սաադին նորից նայեց աշխարհին. տարերքի այս բազմազան ու հրաշազան խաղին, երբ աչքին ընկավ երկու տատրակ, որ կարմիր տոտիկներով շրջում էին կանաչ մարգերի վրա, քաղցր գվգվալով, և նորից խոսեց իր սրտում.<br>
&nbsp;&nbsp;&nbsp;&nbsp;— Կախարդված է աշխարհը, և բոլոր իրերը հմայված են մի անտեսանելի վհուկի դյութական գավազանով, և հեքիաթացած է ամեն բան։<br>
&nbsp;&nbsp;&nbsp;&nbsp;— Աշխարհը գլխիվայր հոսում է, քայքայվում է ու ձևալուծվում, և ի՞նչն է, որ նորից կերտում է ու կաղապարում այս հոյակապ աշխարհը, և մեր հոգու շուրջը փռում այս հրաշքն ու հեքիաթը։<br>
&nbsp;&nbsp;&nbsp;&nbsp;Ո՞վ ստիպեց եղնիկին, որ պապակ սրտով մագլցի սեպ Ժայռերը՝ եղջյուրները քարերին փշրելով տարփալից մռնչյունով թավուտները թինդ հանե։<br>
&nbsp;&nbsp;&nbsp;&nbsp;Ո՞վ ստիպեց, որ վարդը ճեղքե իր զմրուխտյա զրահը և բուրե հեշտագին:<br>
&nbsp;&nbsp;&nbsp;&nbsp;Ո՞վ ստիպեց մարդուն, որ անհայտից բխե ձև ու հոգի առած՝ մտածելու և տառապելու համար. զգալու հուրը մեզ այրող ըղձանքի և չփափագի երբե՛ք մեռնելու։<br>
&nbsp;&nbsp;&nbsp;&nbsp;Ո՛վ սեր, դո՜ւ անպարտելի ստիպմունք, դո՛ւ քաղցր բռնություն, ես վաղո'ւց ճանաչում եմ քեզ: Սակայն բնավ չհասկացա քո խորքն ու խորհուրդը...<br><br>

&nbsp;&nbsp;&nbsp;&nbsp;Եվ տեսանողի հոգով նախազգաց Սաադին, որ այս վերջին գարունն է, որ ինքն ապրում է:<br>
&nbsp;&nbsp;&nbsp;&nbsp;Վերջի՛ն գարունը։<br>
&nbsp;&nbsp;&nbsp;&nbsp;Պարտեզի դռնակը բացվեց:<br>
&nbsp;&nbsp;&nbsp;&nbsp;Սպիտակ շղարշները հովին ծփծփուն՝ ներս մտավ Նազիաթ, Սաադիի սիրած շիրազուհին, որ միշտ այցի էր գալիս ծերունի բանաստեղծին։<br>
&nbsp;&nbsp;&nbsp;&nbsp;Նազիաթի գինեվետ շրթները և հոլանի թևերի լույսն ու կրակը շա՜տ անգամ արևազարդել էին դարևոր Սաադիի անքուն գիշերները։<br>
&nbsp;&nbsp;&nbsp;&nbsp;Սաադին սիրում էր նրան իր անթառամ սրտի երիտասարդ ավյունով, և ոսկի բառերով քանդակել էր նրա պատկերը անմահ «Գյուլստանի» մեջ:<br>
&nbsp;&nbsp;&nbsp;&nbsp;Նազիաթ՝ վարդերի փունջը գրկին, մոտեցավ բանաստեղծին և վարդաբույր ձայնով ողջունեց:<br>
&nbsp;&nbsp;&nbsp;&nbsp;Տխուր էր Սաադին։ Հառաչանքը թրթռում էր նրա գունատ շրթներին։<br>
&nbsp;&nbsp;&nbsp;&nbsp;— Ինչո՞ւ ես տխուր, դո՛ւ, ամենաերջանիկր մահկանացուներիս մեջ։ Ինչո՞ւ ես տխուր։<br>
&nbsp;&nbsp;&nbsp;&nbsp;Սաադին լուռ էր:<br>
&nbsp;&nbsp;&nbsp;&nbsp;— Ես սիրում եմ քո տխրությունը, ո՛վ Սաադի, իմաստուն է քո թախիծը, և դու ասել ես բո աստվածային լեզվով, թե մարգարիտը վերքից է, որ կծնի, և խունկը այրվելով է, որ իր անուշ հոգին կբուրե:<br>
&nbsp;&nbsp;&nbsp;&nbsp;Սաադին նայեց Նազիաթին դալուկ ժպիտով։<br>
&nbsp;&nbsp;&nbsp;&nbsp;— Տե՛ս, վարդեր եմ բերել քեզ համար, իմ պարտեզի թավիշ վարդերից:<br>
&nbsp;&nbsp;&nbsp;&nbsp;Եվ ծերանուն պարուրեց վարդերով և լուսեղեն մատներով շոյեց բանաստեղծի ճակատի մռայլը։<br>
&nbsp;&nbsp;&nbsp;&nbsp;— Քո շնորհած վարդերը, ո՞վ դրախտի աղջիկ, աշխարհի ամենաչքնաղ վարդերն են եղել միշտ և երբեք չեն թառամել։<br>
&nbsp;&nbsp;&nbsp;&nbsp;— Այո՛, Սաադի. «Ինչո՜ւ վարդը հոտոտելիս խորհել նրա վաղանցուկ շնորհի մասին։ Պահի՛ր հիշատակը բույրի և դյուրին կլինի մոռանալը, որ վարդը թառամած է վաղուց»։<br>
&nbsp;&nbsp;&nbsp;&nbsp;Արծաթի ձայնով արտասանեց Նազիաթ բանաստեղծի վաղեմի խոսքերը։<br>
&nbsp;&nbsp;&nbsp;&nbsp;Եվ նրա երազաբույր վարսերը գգվեցին Սաադիի դեմքը, երբ Նազիաթ ծունկի եկավ բանաստեղծի մոտ. ե պարտեզում մի անուշ հով ծիածանի թևերը թափահարեց Սաադիի գլխի վերևը — այդ Զմրուխտ թռչունի չքնաղ թևերն էին, որ ծուփ եկան, երբ Սաադին դողդոջ մատներով շոյեց Նազիաթի երազաբույր վարսերը։<br>
&nbsp;&nbsp;&nbsp;&nbsp;Եվ ապա Սաադին հոգու խորին հատակից նայեց մեկ՝ իր շուրջը բռնկած հեքիաթ-աշխարհին, մեկ՝ իր առջևը՝ լուսաժպտուն հրաշք-աղջկան, և զգաց տաք արցունքի մի կաթիլ իր հին սրտի մեջ, և բռնելով աղջկա փոքրիկ ձեռքը, համբուրեց ու դրեց լացող սրտի վրա՝ ասելով.<br>
&nbsp;&nbsp;&nbsp;&nbsp;— Քո շուշան մատներով գրի՛ր «Գյուլստան»–իս հետին էջի վրա իմ այս վերջին խոսքերը.<br>
&nbsp;&nbsp;&nbsp;&nbsp;«Ծնվում ենք ակամա, ապրում ենք զարմացած, մեռնում ենք կարոտով...»։<br><br>

&nbsp;&nbsp;&nbsp;&nbsp;''Վենետիկ''